Jham jham barsa paani re
Umad-ghumad kar aaye badarwa,
jham-jham barsa paani re.
gaane laga kisaan magan ho,
dharati hai gud dhaani re.
kal-kal-kal sangeet chhedati,
nadiya ki har lehar-lehar.
rimjhim barkha ke charche hain,
gaaon-gaaon, har shahar-shahar.
Mor naache thirak-thirak,
kuke koyalia 'kuhoo-kuhoo'
hariyaale wan-upwan bole--
aaj papiha 'pihoo-pihoo'.
sondhi sondhi mehake maati,
mast-niraali, matwaali.
lagi lagi barasane daal daal se,
jaamun re kaali-kaali.
boond boond se bharati gaagar,
saagar geharaa bhar jaata.
boond boond ka mol jaanta,
wahi jagat mein leharaata.
ped-ped pad gaye hindole,
barkha mein bhiga tan-mann,
nav umang se hua aanandit,
saare bhutal ka kan-kan.
Poem:Shivnarayan Singh
Submitted By: Deepak on 10 -Nov-2010 | View: 7762
|
