Darpan ki sikh
Door desh mein thi ek raani,
rani ki tum suno kahaani,
khud ko 'Sona' kehane waali,
haath mein kangan, kaan mein baali.
lambe-lambe baalon waali,
roop rang mein thi wo kaali,
swayam par usko bahut ghamand,
har dam kahe dekh darpan.
hey darpan tum mujhe bataao,
kya mujh sa koi dekha hai,
pariyon jaisi kaaya meri,
roop bhi mera anokha hai.
karati sabse durvyavhaar,
sikha-sikha sab gaye haar,
jab bhi koi nikat ko aaye,
kare katu waani ka prahaar.
darpan ne ek din batlaaya,
roop ka sahi arth samjhaaya,
bola-rani kuchh mat kah,
uss ishwar se darr kar rah.
apne mann ka darpan khol,
aisi waisi baat na bol,
naam mila hai tujhko 'Sona',
mail padega tujhe hi dhona.
tan ke sundar bahut hain hote,
roop rang mein bade anokhe,
par tu kewal dheeraj dhar,
jaise kahun tu waisa kar.
chhod de roop rang ki kaaya,
yeh sab to iss jag ki maya,
kewal mann sundar jo paaye,
ish nikat wah hi aa jaaye.
Poem: kanika Taneja
Submitted By: Vikram on 11 -Nov-2010 | View: 6172
|